سياسة الخصوصية
النسخة 2026-11-15 · مسوّدة.
⚠️ الصفحة دي مسوّدة تنتظر مراجعةً قانونيّة. اللي مكتوب هنا هو اللي البرنامج بيعمله فعلًا النهارده. أما الصياغة القانونية (وأولها قانون حماية البيانات الشخصية المصري رقم 151 لسنة 2020) فلسه محامي ما راجعهاش، فما تعتمدش عليها في عقد.
١ · مين مسؤول عن إيه
لما شركتك تستعمل تشييدنا، شركتك هي صاحبة القرار في بيانات موظفينها وعمالها ومورّدينها، وتشييدنا بيشغّلها بتعليماتها. اتفاقية معالجة البيانات المكتوبة (DPA) لسه مش جاهزة.
٢ · بنحفظ إيه
| النوع | مثال | ليه |
|---|---|---|
| بيانات الحساب | الاسم، الإيميل أو رقم الواتساب، الدور | الدخول والصلاحيات |
| الجلسات | رمز الجلسة والجهاز وتاريخ الانتهاء | إنك تفضل داخل بأمان — بتتمسح لما تخرج أو تنتهي |
| التحقق بخطوتين | سر التطبيق ورموز الاسترجاع بشكل ما يتقريش (لحسابات إدارة المنصة) | طبقة حماية تانية — بتتمسح لما تُستعمل أو تتعمل مجموعة جديدة |
| العمال والفرق | الاسم، الشهادات، ساعات الشغل | إنتاجية الموقع ومطابقة الحضور |
| صور الموقع | الصورة ومكانها لما بتتصوّر | دليل على اللي اتنفّذ وفين |
| جهات الاتصال | المالك، الاستشاري، المورّد | المراسلة ومشاركة المستندات |
| سجل التدقيق | مين عمل إيه وإمتى | دليلك لو حصل خلاف على فلوس |
| سجل الموافقات | الغرض، القرار، نسخة النص، التاريخ | إثبات الموافقة وسحبها — بيتضاف عليه وما بيتعدّلش |
٣ · لحد إمتى
الورق المالي (العقود، المستخلصات، أوامر الشراء، الضمانات) بيفضل 7 سنين على الأقل بعد ما العقد يخلص، لأن مسحه بيضيّع على المقاول دليله في خلاف أو فحص ضريبي. بيانات الدخول القصيرة (الجلسات، استرجاع كلمة السر) بتتمسح أول ما تخلص أو تُستعمل.
المدد دي مقصودة، بس لسه مفيش مهمة بتمسح لوحدها على أساسها. بنقولها كده بدل ما نسيبك تفتكر العكس.
٤ · البيانات محفوظة فين
البرنامج شغّال دلوقتي على جهاز بتشغّله تشييدنا جوّه مصر. وعليه بيانات حسابك، وبيانات شركتك ومشاريعها، والصور والملفات اللي بترفعها.
وكل يوم بتتعمل من البيانات دي كلها نسخة احتياطية مشفّرة (محدش يقدر يقراها من غير مفتاحنا) وبتتحفظ على Google Drive، يعني على سيرفرات Google برّه مصر. وبنجرّب إنها بترجع فعلًا، مش بس إنها اتعملت.
ده نقل بيانات شخصية لبرّه مصر، وبيخضع لقانون حماية البيانات الشخصية رقم 151 لسنة 2020.
- مين يوصل للبيانات: مستخدمين شركتك، كل واحد على قد دوره. وفريق تشييدنا لما يدعمك أو يصلّح مشكلة. ومفتاح فك النسخ الاحتياطية معانا إحنا بس.
- النسخ الاحتياطية بتفضل قد إيه: آخر 14 نسخة يومية، و8 أسبوعية، و12 شهرية، والأقدم بيتمسح لوحده (وممكن يفضل في سلة Google Drive لحد 30 يوم). ونسخة كل سنة لسه مفيش لها مدة مسح.
- عايز نسخة من بياناتك أو تمسحها؟ اطلب من مسؤول الحساب في شركتك، أو كلّمنا على الواتساب اللي في بند ٧.
٥ · حقوقك — وفين وصلنا
| الحق | الحال |
|---|---|
| تعرف إحنا حافظين إيه عنك | ✅ الجدول اللي فوق |
| توافق وتسحب موافقتك | ✅ من البرنامج: الغرض ونسخة النص والتاريخ. والسحب سهل زي الموافقة، ومش محتاج إذن حد |
| تصدّر بياناتك | التقارير بتتصدّر Excel من البرنامج. ⛔ تصدير كل بيانات الشركة مرة واحدة لسه مش من البرنامج — اطلبه مننا ونجهّزهولك |
| المسح أو إخفاء الاسم | ⛔ لسه مفيش طريقة من البرنامج — والقرار قانوني: المسح الحقيقي بيبوّظ صحة الورق المالي المرتبط، والمعتاد إخفاء الاسم |
| تصحّح بياناتك | ✅ من مسؤول الحساب في شركتك |
| اتفاقية معالجة (DPA) | ⛔ لسه مفيش ورقة |
٦ · الحماية
- الاتصال مشفّر، وكلمات السر محفوظة بشكل ما يتقريش.
- كل شركة بياناتها معزولة عن غيرها في كل طلب، والعزل ده بيتختبر.
- كل واحد بيشوف على قد دوره: المشرف والمهندس ما بيشوفوش أسعار ولا فلوس.
- تقدر تخرّج حسابك من أي جهاز من «الأمان». والتحقق بخطوتين شغّال لحسابات إدارة المنصة.
- النسخ الاحتياطية مشفّرة، وبنختبر إنها بترجع.
- الملفات اللي بتترفع بتتفحص قبل ما تتحفظ.
٧ · تكلّمنا إزاي
أي سؤال عن بياناتك: كلّم مسؤول الحساب في شركتك الأول، لأنها صاحبة القرار. ولو حاجة تخصّ الأمان أو عايز تكلّمنا إحنا: واتساب تشييدنا.